Yang Kitab Injil yang Pyaglaongan ng Tohan na yatag ng Tohan sang manosiya sonod pa sang Kitab Tawrat aw yang Kitab Jabor. Yang yamakalasak sang Kitab Injil yang bago na pyagapasadan na ininang ng Tohan sang manosiya sabap kang Isa Almasi. Yani na pyagapasadan matawag oman ng Madyaw na Gogodanun kay ansini na pyagapasadan yagapakita yang Tohan daw ono yang kanan pamaagi antak amponon aw atarimaun nan yang manosiya na matorid.
Yang Kitab Injil aon 27 ka bain aw aon sampoo aw dowangka otaw na pipili ng Tohan sang pagsorat sinyan. Yang opat ka bain na tyatawag ng Madyaw na Gogodanun pyapasorat ng Tohan kang Matiyo, Markos, Lukas aw si Yahiya. Yang bain na pyagatawag Yang Gawbuk ng mga Sahabat syosorat oman ni Lukas. Sonod san aon 13 ka sorat na yagasikun kang Paulus aw aon waongka sorat sikun sang kadaigan pa na mga sahabat ni Isa Almasi. Yang kariko sinyan na mga sorat pyapadaa adto sang mga jamaa sang yagakatuna-tuna na mga banwa. Yang kataposan na bain ng Kitab Injil yang Pyapakita na pyapasorat ng Tohan kang Yahiya.
Yang yamakalasak sang opat ka Madyaw na Gogodanun yang makapantag sang kinabowi ni Isa Almasi adi sang donya sikun pa sang kanan pagkaotaw, yang pyagaindo aw ininang nan sampay da sang kanan pagkamatay aw pagkabowi oman nan. Yang lasak sang Gawbuk ng mga Sahabat yang makapantag sang pagpayapat ng mga sahabat sang Madyaw na Gogodanun kipat sang pagtokod ng mga jamaa adto sang yagakatuna-tuna na mga banwa. Yang mga sorat yagapakatigam sang manosiya daw monono yang batasan ng mga Almasihin kipat sang madyaw na pagpangagad nilan kang Isa Almasi. Sang Pyapakita mabatya yang makapantag sang mga pangitabo sang kataposan na mga allaw bago pa bomarik si Isa Almasi.
Yang Kitab Injil yamakasorat sang tiniyaban na Grik kay yani yang tiniyaban na gyagamit sang madaig na mga banwa sang panahon ni Isa Almasi. Awgaid sabap ng karim ng Tohan na yang kariko ng manosiya makabatya aw makasabot sang kanan pyaglaongan yamaobad yang Kitab Injil sang tiniyaban na Kalagan antak yang mga Kalagan oman makasabot sang kanan pyaglaongan. Kaloyan pa gao ng Tohan yang kariko ng magabatya sini na Kitab.
Wassalam.
